-प्रवीण ढकाल
काठमाडौँ,
२२ वैशाख । वीर अस्पताल परिसरमा रहेको दुई सय शैय्याको अत्याधुनिक
‘इमर्जेन्सी एन्ड ट्रमा सेन्टर’ (आकस्मिक एवं दुर्घटना सेवा केन्द्र)
सरकारले केन्द्रीय स्वास्थ्य संस्थाका रुपमा सञ्चालन गर्ने भएको छ ।
दुर्घटनाबाट घाइते भएकाको उपचारका लागि भारतले बनाइदिएको ट्रमा सेन्टर
चिकित्सा विज्ञान राष्ट्रिय प्रतिष्ठान (न्याम्स) अन्तर्गत नभई केन्द्रीय
संस्थाकै रुपमा सरकारले सञ्चालन गर्न लागेको हो ।बिहीबार बसेको मन्त्रिपरिषद् बैठकले स्वास्थ्य मन्त्रालयमातहत केन्द्रीय संस्थाका रुपमा ट्रमा सेन्टर सञ्चालन गर्ने निर्णय गरेको हो । निर्माण भए पनि विभिन्न समस्याका कारण चार वर्षदेखि सञ्चालनमा आउन नसकेको ट्रमा सेन्टर न्याम्सअन्तर्गत सञ्चालनको तयारी भएको थियो । मन्त्रालयले न्याम्सअन्तर्गतको वीर अस्पताल राजनीतिक समस्याका कारण धराशायी हुँदै गएको भन्दै ट्रमा सेन्टरको अवस्था पनि त्यस्तै हुने भन्दै छुट्टै संस्थाका रुपमा चलाउनुपर्ने प्रस्ताव मन्त्रिपरिषद्मा लगेको थियो ।
मन्त्रालयको चिकित्सा महाशाखा प्रमुख डा. तीर्थराज बुर्लाकोटीले ट्रमा सेन्टर निर्माण भएको समयमा न्याम्स नै नभएकाले सेन्टरलाई तत्कालका लागि मन्त्रालय अन्तर्गतको संस्थाका रुपमा सञ्चालन गर्न लागिएको बताए । पहिलो चरणमा ५० शैय्याको सेन्टरमात्र सञ्चालन गर्ने तयारी मन्त्रालयको छ । डा. बुर्लाकोटीका अनुसार भारत सरकारले हस्तान्तरण गरेलगत्तै सेन्टर सञ्चालन गर्नुपर्ने भएकाले आवश्यक कर्मचारीलाई तालिम दिनेलगायतका व्यवस्था अन्तिम चरणमा पुगिसकेको छ । उनले सेन्टरको निर्देशक वैशाखको सुरुमै नियुक्ति गरिसकेको जानकारी पनि दिए ।
जग्गा विवाद र राजनीतिक समस्याका कारण सञ्चालनमा ढिलाइ भएको सेन्टर पछिल्लो समय कसको स्वामित्वमा रहने भन्ने विवादले सञ्चालनमा आउन सकेको थिएन । गत पुसदेखि नै सेन्टर सञ्चालनमा आउने भनिए पनि न्याम्सअन्तर्गत सञ्चालन गर्ने कि मन्त्रालयले सञ्चालन गर्ने भन्ने विवाद थियो । न्याम्सले पुसदेखि नै सेन्टर सञ्चालन गर्ने प्रक्रिया पूरा गरेको थियो । उसले पहिलो चरणमा १४ डाक्टर र १५ जना नर्सलाई तालिमका लागि भारत पठाउन भनेर मन्त्रालयमा गत कात्तिकमै नामावली पठाएको थियो ।
त्यस्तै ट्रमा सञ्चालनका लागि आवश्यक पाँच सय ९८ कर्मचारीमध्ये सुरुमा दुई सय ६० जना भर्ना गर्न आवश्यक तयारीसमेत गरे पनि मन्त्रालयले सेन्टरको स्वामित्व टुंगो नलागेको भन्दै २८ मंसिरमा पहिलोपटक र २० पुसमा दोस्रो पटक पत्र पठाएर कुनै नियुक्ति नगर्न निर्देशन दिएको थियो ।
गत वैशाखमा भारतीय विदेशमन्त्री एसएम कृष्णाको नेपाल भ्रमणका क्रममा दुवै देशका अधिकारी बसेर ट्रमा सेन्टर हस्तान्तरणको मिति तय गर्ने सहमति भएको थियो । तत्कालीन भारतीय प्रधानमन्त्री आइके गुजरालले १८ वर्षअघि शिलान्यास गरेको सेन्टर एक अर्ब २५ करोड रुपियाँमा निर्माण गरिएको हो ।
